2015 | 28. სექტემბერი - 02. ოქტომბერი | ყოველი დღის 11 საათიდან
გოეთეს ინსტიტუტი საქართველოში
ზანდუკელის 16,
0108 თბილისი
რეფერენტი – თომას ტოდე (ჰამბურგი)
კონცეფცია და ორგანიზატორი – სოსო დუმბაძე (თბილისი / კელნი)
საქართველოს ფრანგული ინსტიტუტის, გოეთეს ინსტიტუტის და საფრანგეთისა და გერმანიის საგარეო საქმეთა სამინისტროს ერთობლივი კულტურული პროგრამის »ელისეს« ხელშეწყობით
»ჩვენი ამოცანაა არა პოლიტიკური ფილმების კეთება, არამედ ფილმების პოლიტიკურად კეთება« (ჟან-ლიუკ გოდარი, 1960-იანი წლები) – ამ საპროგრამო განსაზღვრებამ ცენტრალური ევროპა მიიყვანა დოკუმენტური კინოს ერთ-ერთი ჟანრის, »ესეი ფილმის«, აღორძინებასთან. 1968 წლისათვის ევროპელმა კინემატოგრაფისტებმა კინომედიუმი გამოიყენეს იმდროინდელი საზოგადოების ავტორიტარული მოდელების კრიტიკის ინსტრუმენტად.
საქართველოში ფილმის ეს კატეგორია, სამწუხაროდ, თითქმის უცნობია. დღესდღეობით კრიტიკული ესეი ფილმის საზოგადოებრივ-პოლიტიკური მნიშვნელობა საქართველოში ისეთივე აქტუალური შეიძლება გახდეს, როგორც ეს 1950-1980-იანი წლების დასავლეთ ევროპაში იყო.
თანამედროვე პოლიტიკური ესეი ფილმის სტრატეგია და მექანიზმები განახლდა – 1960-იანი წლების კინოავტორის არგუმენტაცია კომპილაციური მონტაჟით გამოიხატება; დიდაქტიკური თხრობა დღეს ფილმის დრამატურგიით შეიცვალა, კინოესეისტის არტიკულაცია კი მონტაჟით; ფილმის პოლიტიკური სათქმელი არა მხოლოდ მისი შინაარსით, არამედ ფილმის ესთეტიკითაც განისაზღვრება.
სემინარზე განიხილა ისეთი კინოესეისტების შემოქმედება, როგორებიც არიან – კრის მარკერი, ჰარუნ ფაროკი ჟან-ლიუკ გოდარი, ჰიტო შტეიერლი, მარგერიტ დიურასი, ანიეს ვარდა, ალექსანდრე კლუგე და სხვანი.
ამ კინოსემინარისათვის სა.გა.-მ ქართულ ენაზე გამოსცა კრის მარკერის, თომას ტოდეს და ჰარუნ ფაროკის კინოკრიტიკული ნარკვევების კრებული »პოლიტიკური ესეი ფილმი«
