კოტე მიქაბერიძე

ქართველ კინორეჟისორის, სცენარისტის, მსახიობისა, დუბლაჟის რეჟისორის და მხატვრის – კოტე მიქაბერიძის (1896-1973) შესახებ გამოფენის ხახსნაზე გაიმართება საზოგადოებრივი გამომცემლობა სა.გა.-ს მიერ გამოცემული წიგნის »კოტე მიქაბერიძე« პრეზენტაცია.

საგამოფენო ექსპოზიციაზე წარმოდგენილი იქნება ფოტო და წერილობითი მასალა, ასევე, კოტე მიქაბერიძის ფერწერული და გრაფიკული ნამუშევრები, რომელთა ნაწილი საჯაროდ პირველად გამოიფინება.

დამთვალიერებელს საშუალება ექნება დარბაზში განთავსებულ მონიტორებზე ნახოს მიქაბერიძის მიერ გადაღებული ფილმების ყველა შემორჩენილი და ხელმისაწვდომი ასლი: »ჩემი ბებიას« (1929) გარდა, კინომოყვარულთა და პროფესიონალთა წრეებისთვის ნაკლებად არის ცნობილი მიქაბერიძის სხვა სარეჟისორო ნამუშევრები: »ჰასანი« (1932), »ქაჯეთი« (1936), »ფორპოსტი« (1941), »ალბანეთის დელეგაცია საქართველოში« (1952) და სხვა.

წიგნი პირველი მოცულობითი მონოგრაფიაა რეჟისორის შესახებ. მასში თავმოყრილია კოტე მიქაბერიძის შემოქმედებასა და ბიოგრაფიასთან დაკავშირებული უნიკალური დოკუმენტები 14 სხვადასხვა არქივიდან. თავში »რეპრესია 1957-1959« წარმოდგენილია აქამდე გამოუქვეყნებელი და მიქაბერიძის დაპატიმრებისა და გასამართლების დღემდე უცნობი დოკუმენტები.

დასწრება თავისუფალია